新冠肺炎疫情令香港嘅經濟大受打擊,今個禮拜陸續有市民收到政府派發嘅一萬蚊,多間大型飲食集團合共過千間食肆,由下週三(15日)起提供「7月7折、8月8折」優惠,希望市民收到一萬蚊之後多啲外出用膳,帶動生意,幫助業界度過難關。

「7月7折、8月8折」優惠將於下週三晚上6點之後開始提供,食肆可以彈性制定單一菜式或者套餐優惠。有份推動呢個計劃嘅飲食界立法會議員張宇人表示,呢個計劃有過千間食肆參與,名單會網站公布(http://diningdiscount.hk/),又會設計一啲標籤俾食肆張貼,方便市民辨認。

張宇人又話,過去半年飲食界都面對好大困難,希望飲食界能夠趁呢個計劃,吸納到政府現金發放計劃嘅一半金額,即係大約350億元,但近日香港疫情再次反覆,或會影響市民外出用膳意欲,唔排除會有食肆加入或者退出,呼籲業界亦要做好防疫功夫。

原圖:大公報