新冠肺炎疫情稍緩,唔少國家都開始逐步解封,振興經濟。英國政府宣佈,由聽日(10號)起解除59個國家及地區人士入境英格蘭需要自我隔離14日嘅規定,當中包括香港、澳門同台灣。

除咗港澳台三地之外,其他獲豁免隔離14日嘅國家及地區仲有南韓、日本、越南、法國、德國等,完整名單可以喺呢個網站查閱:https://www.gov.uk/guidance/coronavirus-covid-19-travel-corridors

呢項入境免隔離措施目前只適用喺英格蘭,蘇格蘭、威爾斯、北愛爾蘭唔適用。英國運輸大臣夏博思指,會以紅、黃、綠三色嚟區分疫情傳播風險。德國、法國、意大利同西班牙等被列入黃色級別,彼此會有互不隔離檢疫嘅安排。至於新冠肺炎感染率仍然高企嘅美國,就喺紅色級別,嚟自紅色級別嘅國家或地區旅客入境英格蘭仍需隔離14日。

圖:網上圖片