藝術為我哋嘅生活帶來色彩、增添樂趣,但就有自私之人無視藝術家嘅心血,肆意破壞。早兩日本地藝術工作室La Belle Epoque喺facebook撰文指,放喺西環欄杆嘅19對針織娃娃全部被偷走,只留下千瘡百孔嘅毛線,傷透藝術家嘅心。

由上年3月尾開始,La Belle Epoque就喺西環欄杆裝置第一對針織娃娃,之後復活節、中秋節、萬聖節、聖誕節、新年等節日亦有陸續裝置唔同主題嘅娃娃。每對娃娃都面對大海,結伴坐喺欄杆睇日出日落,相當別緻,一年多以來亦吸引唔少人打卡。但就喺2日前,呢19對娃娃被偷得一個不剩,藝術家得知消息大感心痛,唯有趕去將剩低嘅毛冷帶走。隨後La Belle Epoque再出post話:「我們沒有傷心,他們永遠都在」、「他們曾經陪你們,看著香港最美好的風景。」

圖:FB@La Belle Epoque