今個禮拜一,有唔少市民終於都收到政府「現金發放計劃」嗰一萬蚊喇,政府同銀行都呼籲市民經網上申請,一萬蚊直接存入銀行戶口,又可以快啲收到錢。不過竟然有不法之徒,利用呢個機會嚟欺騙市民個人資料,大家真係要小心提防!

商業及罪案調查科反詐騙協調中心署理總督察顏凱欣日前表示,反詐騙協調中心接獲市民查詢,指收到「+852」開頭嘅電話語音,假冒銀行職員聲稱重複登記領取一萬蚊,或資料有誤,導致申請未獲批,其後轉駁至「客戶服務熱線」,由講普通話嘅假冒職員,訛稱核對資料,向市民索取個人資料、銀行戶口同密碼等。

集友銀行灣仔分行主管岑浩璋表示,銀行職員致電客戶時,一般都會報上全名同職號,以識別身份,核對客戶資料時亦唔會要求客戶提供全部個人資料,包括身分證號碼,更不會要求客戶提供戶口密碼,如果收到可疑來電,可以去到香港銀行公會網頁核實相關銀行熱線。

原圖:大公報