今年嘅升中派位今日公布,教育局表示自行分配學位及統一派位階段獲派首三個志願學校嘅學生人數合計,整體滿意率達90%,而獲派首志願學校嘅滿意率就達到77%,兩者都較去年高3%。無法派到去心儀中學嘅學生同家長,仍然可以透過「叩門」去爭取入讀儀嘅學校,有專家就俾咗啲貼士大家,睇下可以點準備叩門面試同筆試。

前喇沙書院副校長、升學專家趙榮德表示,去直資中學叩門機會比較大。佢解釋,今年自行分配學位階段有新安排,如果喺呢個階段獲心儀學校錄取為正取生,家長或會放棄已取錄嘅直資中學學位,估計到時直資中學會釋出部分學位,向呢啲學校叩門成功機會比較大。

趙榮德提醒,向學校叩門前要睇下學校網頁,了解有咩安排,有部分或會設有筆試,一般都會考中英數三科,並以多項選擇題為主,英文或設有短文寫作,佢仲話叩門嘅筆試一般都會以中一程度為標準,唔會淺,而且對英文要求較高。面試方面,趙榮德就話,個人面試同小組討論形式處理會有唔同,內容則離不開學生個人特長、時事議題同英文對答等等。

原圖:大公報