好多現代媽媽唔單止要照顧小朋友,亦要返工賺錢養家,結果錯過咗唔少親子時間。台灣有位媽媽嘅女兒就諗到個方法等媽媽可以陪住自己,就係用自己啲積蓄「買起」媽媽嘅時間!

有位在職媽媽早前喺facebook群組「爆怨公社」分享話,平時星期一至六都要返工,搞到可以陪囡囡嘅時間「少得可憐」。就喺某個星期一朝早,佢準備返工前再抱抱囡囡嗰陣,囡囡突然問佢嘅日薪係幾多,佢就答大概1000台幣(約263港幣),點知囡囡突然拎咗400台幣(約105港幣)話:「但我只有400,可以買你半天嗎?」呢位媽媽就問點解,囡囡嘅答案勁洋蔥:「我想要你陪我睡到鬧鐘響,我起床後你再睡一下」;「然後載我去學校上課你再回家睡覺,我的錢只夠買你半天,時間到你再去上班吧!」又有一晚,囡囡又拎咗600台幣(約158港幣)俾媽媽,話自己會努力考試,考到100分賺獎學金再買媽媽嘅時間。網民媽媽即時內疚落淚,反省自己經常忙於工作,少咗時間陪女兒。網友睇完之後都覺得好感動,大讚囡囡貼心、懂事,仲提醒呢位媽媽抽多啲時間陪佢,以免影響關係。

圖:網上圖片