隨住新冠疫情放緩,全港中小學亦陸續復課,由在家學習到重新返學,唔少學生感到開心、興奮,但亦有人覺得緊張,甚至有壓力。聖雅各福群會早前喺港九新界共6間小學進行「高小學童復課壓力」問卷調查,成功收集咗2021份小四至小六學生嘅問卷,發現有76.6%學生面對復課會有唔同程度嘅壓力。而壓力嘅來源主要係成績未能維持原有水平、學習進度比同輩差、升中銜接等。

聖雅各福群會尋日(7月6號)舉行咗「高小學童復課壓力」調查發佈會,調查結果顯示有44.2%高小學生對復課感到開心,但就有76.6%學生表示面對復課會感到唔同程度嘅壓力,73%學生認為現時嘅學習令佢哋感受到壓力。香港大學社會工作及社會行政學系副教授曾潔雯博士認為,學長應多關心子女嘅情緒,有助佢哋紓緩壓力。同時家長要調整心態同期望,俾多啲空間子女。曾博士亦建議學校老師可以多啲關心學習能力比較弱嘅學生,為佢哋提供適當協助,學校亦可以同社福機構合作開辦課餘託管,幫助有需要嘅家庭。

雖然有49.8%嘅學生表示唔需要學習上嘅支援或服務,但仍有29.7%學生需要課後功課輔導、專科補習支援,20.3%學生認為學校要增加電子教學時間。對此,聖雅各福群會高級服務經理陳艷雯女士就表示聖雅各會加強課後支援支持學生學習需要,而早前亦獲恒生銀行贊助推出「友伴童恒」計劃,將會增加導師人手、延長服務時間、增設網上功課平台等支援小學生復課之後嘅學習同情緒問題。

圖:LOOOP