近年唔同社交平台都開始流行做直播,題材包羅萬有,有人就直播食嘢吸引到唔少觀眾,甚至成為職業賺錢。不過內地就有一位職業「吃播」,喺短短半年內體重急增88磅,帶嚟唔少健康問題,最近喺直播前突然腦出血,送院搶救一週後不治,終年只有30歲。

呢位「吃播」王先生年僅30歲,居於瀋陽,佢以前做過送外賣、街邊燒烤等,但因為收入唔多,大約半年就轉行做「吃播」。佢鍾意食肉,而且食量驚人,所以佢每次直播都會準備豬手、紅燒肉、燒雞等等食物,為咗做直播佢仲會逐漸增加食量,經常都係一日食一餐,平均兩日做一次直播,短短半年佢嘅體重就要220磅急升至308磅。

喺上個月23日晚上,當時王男正準備做直播,但直播前王男突然覺得眼睛痛、膊頭發麻,於是叫佢太太幫手打120(內地急救電話)送院。去到醫院後,王男狀況越來越差,開始失去視力,甚至神志不清、昏迷,醫生檢查後確認係腦幹出血,經過一個星期搶救,王男最終離世。王太表示,王男血壓、血脂一直都好高,佢都有食藥,王太話雖然賺到啲錢,但人就無咗,真係聽見都令人覺得心傷。

原圖:微博@湖北經視