喺唔少星爺周星馳嘅電影作品裡面,不時都會見到「如花」嘅蹤影。不過今日就有傳媒報道,現年59歲、飾演「如花」嘅李健仁去年喺深圳中風,情況一度嚴重,經搶救之後保住性命,但就右邊半身癱瘓同失語,現時正在休養,喺屋企人照顧之下逐漸康復。

李健仁喺讀中學嘅時候,同周星馳係同班朋友,1989年喺周星馳介紹之下入行做幕後場記,到咗1992年李健仁就男扮女裝喺電影《武狀元蘇乞兒》入面客串,展開佢嘅幕前工作,《唐伯虎點秋香》、《國產凌凌漆》、《食神》等等周星馳嘅電影入面佢亦有份演出。至於佢個花名「如花」,就係源於佢响《九品芝麻官》入面飾演如花一角以得嚟,之後就成為佢嘅花名。

近年李健仁就喺內地發展居多,喺去年8、9月李健仁就喺深圳焗桑拿,期間覺得不適,好彩佢助手喺身邊,及時將佢送到醫院搶救。現年59歲嘅李健仁已婚,育有兩女一子,佢哋一家人關係非常好,除咗得到太太嘅悉心照顧,子女亦不時諗方法氹爸爸開心,鼓勵佢去做唔同嘅治療,期待早日康復。

原圖:微博@如花李健仁