受新冠肺炎疫情影響,今年好多場演唱會都要被逼取消或延期,連帶演唱會行業從業員嘅生計都大受打擊。最近成立嘅「香港現場演出及制作行業協會」為咗可以幫業界紓困解憂,宣佈Eason陳奕迅將會喺今個星期六(7月11號),喺網上舉行「Live is so much better with Music Eason Chan Charity Concert」慈善音樂會,希望可以將籌得嘅善款派俾近半年無工開、無收入嘅會員,等佢哋度過難關。

Eason今次嘅網上音樂會唔單止唔收酬勞,仲請埋眾多音樂界好友一齊設計演出內容。Eason話:「你又唔會知道新嘅一日係好定壞,就正如地球係唔會因為你嘅心情而改變,生活仍然要繼續,太陽照常升起。但係我相信,無論係好定係壞嘅嘢,始終都會過去嘅。」所以,音樂會以「日出日落」為主題,將分為早上6點同黃昏5點兩個時段舉行。到時,大家都可以喺「香港演出及制作行業協會」官方平台、全球各個電視台同網上平台睇到Eason嘅精彩演出!

圖:FB@陳奕迅 Eason Chan