就快到暑假喇,香港圖書館又推出一年一度嘅大型兒童閱讀活動喇!今年嘅「夏日閱繽紛2020」活動以「閱讀,伴我成長」為主題,將會喺7月25號至8月10號舉行。香港中央圖書館嘅展覽館更會變成親子共讀天地,透過親子工作坊、故事時間同文藝表演等超過150場精彩活動,等大人細路都可以感受不一樣嘅閱讀體驗。

香港中央圖書館展覽館會分為「閱讀雅舍」、「中央舞台」同「摺紙天地」三大活動區,家長可以陪住小朋友一齊探索、體驗。「閱讀雅舍」將舉辦32場故事時間,透過唔同種類嘅兒童故事同親子互動遊戲,培育小朋友對閱讀嘅興趣。而「摺紙天地」就有導師教參加者摺動物、文具、小玩意、植物等紙作品,發揮小朋友個創意同想象力。至於「中央舞台」一連17日將陸續送上故事劇場、文藝表演同親子工作坊,內容豐富包括管樂同中樂表演、馬戲、魔術、非洲鼓樂、現代舞等唔同表演。

所有「夏日閱繽紛2020」嘅活動都係免費㗎,不過部分活動就要預先報名或索取入場券,大家記得留意活動詳情喇~

圖:政府網頁