喺英國,有一名5歲、雙腿截肢嘅男仔早前仿傚二戰老兵Captain Tom Moore嘅籌款行動,為曾經救過自己嘅一間國民保健署(NHS)醫院步行籌款,原本諗住籌款500英鎊(約4800港元),而家籌款額已經突破120萬英鎊(約1160萬港元),但原來佢有一段令人心酸嘅經歷。

呢名5歲嘅男仔哈吉爾(Tony Hudgell),喺2017年當時仲係一個幼兒,就遭到親生父母虐待,導致全身多處骨折,並且出現中毒性休克同敗血症等症狀。佢被送到NHS醫院Evelina London Children's Hospital救治,最終雙腳需要截肢,其後由養父母照顧。

早前哈吉爾先至學識使用拐杖行路,佢表示係受到二戰老兵Captain Tom Moore嘅步行籌款啟發,決定仿傚為醫院籌款。起初哈吉爾練習行300米就要用咗58分鐘,但去到尾段就可以喺12分鐘行完300米,可以話係進步神速,哈吉爾養母Paula Hudgell大讚哈吉爾堅強,並為佢嘅善行感到自豪。

哈吉爾嘅善行感動到唔少人,獲得唔少名人支持,包括英國劍橋公爵威廉王子及劍橋公爵夫人凱特王妃、前首相卡梅倫同車路士隊長艾斯派古達等等,最終哈吉爾為醫院籌得超過120萬英鎊善款,而醫院亦發聲明表示感激,醫院每個員工都對自己工作感到自豪。

原圖:Twitter@paula_hudgell