喺大埔火車站同廣福道之間,有個小小嘅山丘,自成一國,係一個漫步嘅好地方。山丘上有幾幢古色古香嘅建築,其中綠匯學苑就係由舊大埔警署改建而成,大家嚟到既可以參觀展覽,到餐廳品嘗素食,入住旅館享受一下寧靜,亦可以參加「香草‧慢活」體驗坊,認試一下香草添。

新界第一個永久警署

綠匯學苑前身係大埔警署,亦係英國人喺新界嘅第一個永久警署,建於1899年,本來由兩座單層式建築物組成,分別主樓職員宿舍大樓,1930年代加建單層嘅堂大樓。主樓屬殖民地建築風格,有外廊、紅磚牆、煙囪及斜尖,屋頂受中式風格影響為金字瓦頂。不過,呢幢建築喺2006年起空置,一直到2010年成為活化計劃,由嘉道理農場暨植物園改成「綠匯學苑」。
根據綠匯學苑項目經理張可欣(Stella)表示,由於建築喺7080年代曾改動,所以佢哋修復嘅時候盡量重現原貌,而每個地方亦盡量跟番原本功能,以前嘅宿舍變成旅館,飯堂變成餐廳,而報案室亦成為展覽廳(都係接觸人嘅地方)。


綠匯學苑前身係大埔警署,亦係英國人喺新界嘅第一個永久警署。


以前嘅飯堂變成餐廳,提供素食。


主樓屬殖民地建築風格,有外廊、紅磚牆、煙囪及斜尖,屋頂就受中式風格影響為金字瓦頂。


報案室依家成為展覽廳。


呢個係當年嘅槍房。


昔日困禁犯人嘅地方。

推廣低碳生活

綠匯學苑以推廣低碳生活為主調,而佢哋提供嘅活動亦好豐富,除咗有旅館同餐廳之外,仲有素食班、扎染班等等,喺7月就會舉辦「香草‧慢活」體驗坊,參加者可以喺古蹟嘅優美環境下放慢步伐,放鬆身心同自然連繫。兩小時嘅活動包括香草專題導賞、品茗、享用純素茶點及製作香草鹽藉此探索不同香草的特性、培植、配搭及應用。


綠匯學苑項目經理張可欣(Stella)表示,佢哋希望向市民推廣低碳生活。


餐廳旁有一塊小空地,佢哋希望善用呢個地方,於是就用嚟種植物,一方面提供俾餐廳使用,一方面可以利用廚餘作農田嘅肥料,做到零廚餘,另一方面,亦係一種教育,令大家明白點樣利用有限空間嚟栽種食物。

容易有收成

香草(Herb)亦即草本植物,係帶有香味或藥用價值嘅植物。據Stella表示,其實我哋經常有機會接觸香草,例如西方嘅迷迭香、百里香、鼠尾草,東方都一樣有香草,例如薑、葱、韭菜、蒜、紫蘇等都屬於香草。

依家綠匯學苑內種植咗超過20種香草,Stella表示,香草並唔難種植,不過大家要先認識唔同香草嘅特性,例如氣候、季節、泥土等等,再加以配合,就更易成功。如果係初哥嘅話,Stella推介東南亞嘅香草,例如泰羅勒、香茅、左手香等等,因為東南亞氣候同香港接近,呢類香草可以適應濕熱嘅氣候。反而歐陸式香草,就未必適合夏天種植啦!

Stella仲話,喜歡種植嘅話,香草係唔錯嘅選擇,因為容易有收成,假如插枝的話,個幾月就會有收成,落種子嘅就要兩個月,而且之後可以不斷採收食用,可以維持幾個月甚至更耐,有時採收之後,刺激枝葉生成,仲會生得更靚添!

觀察香草 放空自己

Stella建議大家用唔同嘅感觀去欣賞香草:「每種香草都有唔同嘅形態,所以觀察好重要,每日嘅變化都會好唔同,觀察嘅時候,都可自己放空一下。」另外,大家仲可以用嗅覺、觸覺同味覺同香草溝通。

Stella仲提醒大家,香草都係嚟自大自然,大家應該用感恩嘅態度嚟欣賞,感受大自然嘅祝福。

相片來源:LOOOP.HK


呢種係聖羅勒,唔少宗教儀式都會見到佢。

如果係初哥嘅話,Stella推介東南亞嘅香草,例如呢款藍蝶花。


呢款紫蘇係咪有啲熟口面?食壽司時咪托底嘅咪係囉!


呢款白色邊嘅就係左手香啦。


除咗農田之外,綠匯學苑四周嘅盆栽,都種植咗香草。

大家亦可以去餐廳,飲杯香草製成嘅飲品,呢杯就係洛神花茶啦!