雖然話生前賺到嘅錢財死後都帶唔走,但就唔係人人都好似新加坡呢位張名茪先生咁豁達,明白呢個道理。55歲嘅張名茪不幸患上期肝癌,得返兩個月命,向來樂善好施嘅佢決定將大部分遺產、近50萬新加坡元(約278萬港幣)捐俾慈善組織,幫助有需要嘅人。

據《聯合早報》報道,張名茪原本喺巴士公司工作,兩年前開始有肝硬化,今年2月更確診患上末期肝癌。眼見自己時日無多,張名茪已經立好遺囑,除咗將一小部分嘅錢留俾親人之外,其餘嘅公積金、退休金、保險金同賣樓所得嘅錢都會捐俾慈善機構。

受新冠肺炎疫情影響,張名茪嘅租客收入銳減,佢自覺自己幫唔到手,索性免租俾租客繼續住。之前佢透過朋友得知有一班越南工人因疫情滯留喺新加坡,張名茪就無償收留呢幾個越南工人喺自己屋企住,而呢幾個越南工人亦懂得感恩,幫忙照顧患病嘅張名茪。張名茪話:「很多人受疫情影響,但也不能忘記身邊有更可憐的人,無論自己情況多慘,如果還有能力助人,還是要伸出援手的。」雖然張名茪出身並唔富裕,但佢嘅父母一直向佢灌輸助人為樂嘅精神,所以張名茪成日都會拎儲蓄出嚟幫助身邊有需要嘅人。佢指,身邊嘅朋友都勸佢唔好成日咁慷慨,但張名茪覺得幫人係好正常嘅事,大家都應該如此,仲話:「錢生不帶來死不帶去。」

圖:網上圖片