唔少年輕人都鍾意飲酒消遣,不過飲酒真係要量力而為,頂唔順就唔好勉強。喺台灣桃園市,早前有一名25歲黃姓女子同朋友喺卡拉OK消遣,飲咗幾杯之後表示身體不適,但其他人就以為佢只係酒量差,叫佢繼續飲。點知5個鐘之後,黃女突然倒地,並且吐血、失禁,送院後搶救不治。

警方表示,黃女早前身體不適,有感冒症狀,但依舊約朋友出去唱卡拉OK,起初佢表明唔飲酒,但之後因為盛情難卻而飲咗幾啖,隨即出現頭暈等症狀,當時佢啲朋友以為佢酒量淺,叫佢繼續飲。5個鐘之後,黃女突然倒地昏迷,並出現吐血、失禁等情況,其他人於是報警。救護員到場發現黃女臉色蒼白,無呼吸同心跳,送去醫院搶救不治。

院方表示,抽血檢驗後發現酒精測試值接近3,「高得不可思議」,又指佢體內無毒品反應同外傷,唔排除係急性酒精中毒或者呼吸道遭嘔吐物阻塞而窒息死亡。警方就表示,法醫已經採集黃女血液樣本正進行化驗,有待釐清死因。

原圖:央視網、Facebook