喺新冠肺炎疫情期間,唔少公共設施都暫時關閉,隨住疫情緩和,唔少公共設施同服務都陸續回復正常。康樂及文化事務署早前宣布,轄下所有博物館尋日(7月1日)開始正常開放,家長終於可以帶子女到場參觀,認識新事物。

康文署轄下嘅博物館,包括香港歷史博物館、香港文化博物館、香港科學舘、香港鐵路博物館、香港海防博物館同香港藝術館等等,都已經回復正常時間開放。但康文署亦提到,博物館會採取一系列嘅防疫措施,包括以先到先得嘅方式限制入場人數,參觀人士入場前亦要接受體溫檢測以及用酒精搓手液清潔雙手,又建議入場人士佩戴口罩。另外,博物館亦會加強消毒措施,繼續暫停館內嘅兒童設施。

至於博物館通行證方面,康文署將會安持1月29日至6月30日暫停開放期間有效嘅通行證持有人,憑原有嘅通行證喺指定期間內免費入場,措施變相延長有效日期,有關日數會視乎受影響日數而定,詳情可參閱網上對照表(網址:https://www.museums.gov.hk/documents/10347444/17197118/Table%2bof%2bAdmission%2bFee%2bWaiving%2bPeriod%2bfor%2bMuseum%2bPass%2bHolders.pdf)。

原圖:中新社