同學仔之間互相幫忙好常見,但深圳西麗小學一個叫韋涵宇嘅11歲小朋友,就足足幫咗同班患有漸凍人症嘅小睿成5年咁耐!小睿唔夠3歲就被確診患上漸凍人症,隨住佢嘅肌肉漸漸萎縮,佢只能夠以輪椅代步。小暖男韋涵宇每日都會喺學校門口接小睿,抱佢上輪椅、幫佢交功課、送佢去廁所等好似個私家小看護咁,足足照顧咗小睿五年。

韋涵宇小一見到小睿嗰陣,小睿被同學撞跌,一直企唔返起身,周圍同學又扶唔起佢,但自己行過去一下就抱起咗小睿,佢之後更申請做小睿嘅同桌,做佢嘅「拐杖」。只要小睿一有需要,韋涵宇永遠都係第一個衝過去幫佢嘅人。受韋涵宇影響,全班同學都主動照顧小睿。雖然個個都讚韋涵宇有愛心,但韋涵宇嘅媽媽就好心痛囝囝,同韋涵宇講,如果佢覺得攰可以唔幫小睿,無人會怪佢。不過韋涵宇話,每次看到小睿自己一個人坐喺輪椅上,就覺得難受,所以無論如何都要堅持落去。韋涵宇同小睿成日喺埋一齊,老友鬼鬼,兩個人都希望之後升上中學都可以再做同學添。

圖:網上圖片