相信有唔少人細個都幻想過上太空,唔知喺太空會聽到咩聲、聞到咩味嘅呢?原來美國太空總署(NASA)早喺2008年,就委託咗化學家兼生物化學公司Omega Ingredients創辦人Steve Pearce,研發太空香水(Eau de Space),目的係諗住俾太空人預先熟悉太空嘅環境,最終用咗4年時間研製成功。最近Omega Ingredients發起眾籌,希望將太空香水普及生產,等更多人可以知道太空係咩味道,亦希望提升學生對STEM嘅學習興趣。

太空人兼前國際太空站員Peggy Annette Whitson就曾經喺一個訪問入面形容太空嘅味道,佢話太空聞起嚟就好似開槍後嘅煙硝味,另外仲有一啲苦味。另外亦有太空人形容,太空嘅味道就好似火藥、燒燶咗嘅牛排、覆盆子同埋蘭姆酒混合埋一齊咁。聽起上嚟好似好複雜,希望太空香水早日推出,大家就可以聞到太空嘅味道啦。

現時眾籌項目反映熱烈,Omega Ingredients亦計劃會進一步研發月球香水添!

原圖:NASA、Kickstarter@Eau de Space