DSE仲有半個幾月就放榜,各位應屆考生應該開始為放榜之後做準備。順利升讀本地資助大學課程固然值得開心,但如果成績差小小先升到都唔使灰心,因為本港仲有好多自資學士課程可以揀,而政府亦會提供免入息審查資助計劃,2020至2021學年嘅最高資助額更高達32100蚊。

除咗八間本地資助大學提供各科學士學位課程之外,自資大學嘅學士課程都係另一條升學出路。香港公開大學、樹仁大學、恆生大學、珠海學院、職業訓練局-香港高等教育科技學院、耀中幼教學院、香港伍倫貢學院嘅自資課程亦有多個學科選擇,學費由36900至127900蚊不等。而政府2020至2021學年嘅資助額,更由之前嘅31300加碼至32100,相信可以幫助更多基層考生入讀心儀課程。只要係香港學生,喺DSE考試考獲「3322」嘅成績,並報讀合資格嘅自資首年學士學位課程,就可以申請資助。

圖:rthk