成日講「捐血救人」,其實捐血唔單止救到一個人,仲可以救到一個家庭嘅幸福。綽號「肥仔聰」嘅藝人林子聰喺剛過去嘅父親節,接受香港紅十字會訪問,憶述去年女兒出世時嘅驚險場面,太太同女兒合共需要輸14包血,先至可以逃過大難。佢感謝捐血者嘅無私奉獻,先至令佢可以每一年都開開心心咁過父親節。

林子聰喺短片入面表示,去年女兒林海菲(菲菲)喺太太Christy懷孕6個月就搶閘出世,令Christy非常危險、大量出血,要進行緊急手術,期間輸咗11包血、心臟停頓1分鐘,搶救咗5個鐘先至脫離危險期。至於女兒菲菲,出世嘅時候只有1.9磅,亦需要輸3包血先至可以度過難關。

林子聰感謝佢哋咁堅強,更感謝瑪麗醫院婦產科醫護人員嘅鼎力幫忙,最後亦感謝所有捐血者無私奉獻,創造呢次奇蹟。佢形容捐血救人並唔係一句簡單口號,而係每日都發生緊嘅奇蹟,希望大家繼續創造奇蹟,捐血救人。

原圖:FB@林子聰 (肥仔聰)