新冠肺炎疫情期間,口罩需求大增,九巴早前就自行生產口罩提供俾員工使用,最近九巴亦宣布向有需要嘅市民出售呢啲自家製口罩,喺抗疫路上同香港人同行。

九巴表示,首階段會喺4個地點,包括大欖隧道轉車站(往元朗方向)、紅磡海底隧道收費廣場(往港島方向)、屯門公路轉車站(往屯門方向)同屯門公路轉車站(往九龍方向),設置口罩自動售賣機,市民就可以透過呢啲售賣機買到九巴自家製口罩,每包有10個、售20元。

九巴指出,呢啲口罩由母公司載通國際控股有限公司喺屯門設置嘅生產線生產,過濾層採用咗MBPP白色熔噴無紡布,細菌過濾效率(BFE)同微粒子過濾效果(PFE)就達到至少95%,有效阻隔飛沫同細菌。

另外,九巴亦宣布採取多項措施加強車廂清潔,包括增加車廂放置消毒潔手啫喱嘅巴士數目、更換3000部巴士上車位置消毒地毯、完成超過200部雙層巴士車窗改裝工程,以及展開第二輪以「納米光觸媒」技術消毒巴士車廂工程。

原圖:九巴