因為新冠肺炎疫情關係,關閉多月嘅海洋公園喺6月中重開,採取預約制,限制入場人數,確保訪客有適當嘅社交距離。海洋公園重開至今兩個星期,海洋公園管理及演藝節目執行總監吳守堅表示,園方會逐步增加每日預約名額應付需求。

同時,海洋公園亦將港人生日優惠使用期限延長至8月31日,只要喺2020年1月26日至6月12日公園關閉生日,就可以喺31日前去到海洋公園票務處,出示香港身份證或香港出生證明就可以免費領取當日門票。

另外,海洋公園全新動物展館「小狐獴與大象龜之旅」日前開幕,並且由聽日開始向公眾開放。海洋公園一共有20隻狐獴,其中5隻係由澳洲南部嘅動物園送嚟,組成兩個家庭之後合共生咗15隻狐獴BB,較早前海洋公園就為3隻狐獴BB舉行命名投票活動,結果「茶走」、「齋啡」同「鴛鴦」呢組得票最多,正式成為3隻狐獴BB嘅名字。同場仲有兩隻雄性亞達伯拉象龜,現年約15歲,係由私人贈送俾海洋公園。亞達伯拉象龜係全球體型第二大嘅陸龜,平均壽命達100歲。

原圖:海洋公園

(取自海洋公園網頁)