二三東西,你估到講緊乜東東?其實係指西營盤嘅四條街,亦即係第二街、第三街、東邊街同西邊街,四條街啱啱形成一個長方形,而係上世紀初,呢度曾經成為疫區,亦由此衍生出幾幢保留至今嘅建築。

實驗街區 改善衛生

今日香港人聞肺炎色變,但喺1920世紀初,香港人最怕嘅可能係鼠疫。根據長春社文化古蹟資源中心助理項目經理劉天佑表示,香港早喺1894年就開始爆發鼠疫,之後斷斷續續困擾香港幾十年,令政府非常頭痛!其中喺1903年,西營盤常豐里就爆發咗鼠疫,於是政府就將「二三東西」四條街形成嘅長方形劃為「實驗街區」,原來政府發現當年華人衛生情況好差,所以就將部分居民搬走,至於剩低嘅空間,政府租嚟做診所同浴室,前者係俾居民可以及早求醫,後者當然就係想改善居民嘅衛生情況啦,事關以前想睇醫生同沖涼,並唔係一件咁容易嘅事嚟架。


今天喺西邊街一帶,仍保留多幢跟抗鼠疫有關嘅建築。

鄉紳集資 建立醫院

依家喺第三街有一幢古色古香嘅建築,就係長春社文化古蹟資源中心,正係同當年抗疫有關。話說華人鄉紳劉鑄伯同馮華川覺得只有診所係唔夠嘅,因為當年唔少居民都係住床位,佢哋有病在身,往往成為不受歡迎人物,甚至被迫流落街頭,因此需要一個俾病人留醫嘅地方,於是佢哋就向區內人集資興建醫院。

經過幾年之後,佢哋終於籌集到足夠嘅資金,就喺1909年建立西約公立方便醫局,到咗30年代中,呢幢建築歸還俾政府,樓上成為醫護宿舍,樓下就變成診所、出生登記處等,之後幾經易手,喺2005年翻新後就成為長春社文化古蹟資源中心,而昔日用作殮房嘅小石屋仍然保留至今。


劉天佑指示嘅,就係長春社文化古蹟資源中心門外嘅牌匾,記錄咗劉鑄伯同馮華川籌建醫院嘅事跡。


長春社文化古蹟資源中心前身就係西約公立方便醫局,建於1909年。


中心仍保留當年嘅面貌,二樓曾經係醫護宿舍。

公共浴室 欠缺私隱

至於另一幢因鼠疫而建嘅古蹟,就係位於第二街與西邊街交界第二街公共浴室。原來當年西營盤唐樓都無供水系統,市民要街「攞水」上樓使用,有啲板間房住戶只可以喺共用嘅廚房(通常仲要無門)沖涼,後來政府為咗抗疫,就開始呢個浴室,而呢個政策相當有效,大大改善居民嘅衛生情況,本來只係木屋改建,到咗1922年就建成今日嘅永久性浴室。

而家浴室內外都保留咗當設計,兩層高的樓房採用結實花崗岩地基後方頂部保留1支過往燒煮熱水所用的磚砌煙囪,牆身磚砌設計,牆上設有氣窗就係舊日通風設計。浴室內部有20個淋浴格分兩邊緊貼排列,中間只靠嘅牆嚟分隔,基本上無乜私隱可言,但浴室勝在唔收錢之餘仲有充足熱水,所以喺上世紀20年代,每日有2千幾人使用,即使到咗今天,仍然有好多人使用。

相片來源:LOOOP.HK

粉紅色嬌俏外牆十分搶眼!

當年高峰時期,每日使用人次高樓2000人!


牆上嘅氣窗,保留當年嘅特色。


浴室嘅間隔,毫無私隱可言。


位於常豐里的福德廟係西營盤香火最鼎盛嘅街廟,廟嘅一大特色係刻有「宣統元年(1909年)己酉端陽重修」牌匾,見證廟宇喺西營盤嘅長久歷史。