夏天,當然要到海灘暢泳!不過想暢泳,原來唔一定要去海灘或泳池,因為香港仲有一樣好有本土風味嘅游泳地方,就係泳棚啦!泳棚喺香港曾經非常盛行,不過時代變咗,泳棚亦逐漸減少,而家香港碩果僅存嘅泳棚就係位於港島嘅西環泳棚!呢度無救生員,而且一落就係深水,大家千祈唔好貿貿然落水,不過假如喺度打下卡,就絕對無問題。

打風落雨照游

西環泳棚建於1988年,因為當年公眾游泳池仍未普及,所以唔少居民就喺海邊搭建一個竹棚,方便泳客嚟游水。現時屬於兩個街坊會,分別係西環街坊福利會嘅金鐘冬泳團同埋摩星嶺街坊福利會嘅泳廬,雖然有兩個會,但共用同一個落水嘅地方。

金鐘冬泳團嘅林聖洲先生接受港台節目《街坊體育會》訪問時講過泳棚同泳池嘅分別,佢話:「泳池有氯氣,當年我未搵到呢度時,有一年游泳池,發現泳池游得多,頭髮會變色,大家可以留意一下,香港嘅泳水,頭髮都有啲金,有啲硬。」佢仲話,差不多一年三百六十五日都會嚟游水,即使打風落兩,除非浪好大,否則都會嚟,冬天23度,都一樣有人游!一般嚟講,最早34點就會有人嚟游水,最多人係朝早7點左右。

勿在木橋亂跳

要前往西環泳棚,可以先坐港鐵到堅尼地城站C出口,然後一直向西行,沿住域多利道方向一直走,行大約1520分鐘,經過廢料轉運站,再繼續沿馬路走,就會發現有兩條落山嘅樓梯,就係通往泳棚。假如想慳番啲腳骨力,亦可以乘坐巴士1號、43M971等,喺港島西廢物轉運站落車再過馬路就到啦!

到咗樓梯往下走,落咗一陣就會見到一間簡陋嘅鐵皮泳棚,係俾泳客沖換衫嘅地方,再繼續行,就會發現有條木橋延伸到海面上,配搭潮漲潮退,浪花拍岸,就係拍攝嘅最佳題材,由於位於港島西邊,假如日落黃昏嘅時候,更加係靚到爆燈!

林先生喺訪問中亦表示,近年多咗人嚟打卡,佢話拍照嘅話,對佢哋影響唔大,不過佢都提醒大家:「有啲人唔係太自律,成班人喺木橋上跳,長期咁樣,會對木橋做成損害。」亦希望遊人能保持清潔,否則就變成要泳棚為佢哋執手尾啦,大家記住啦!

相片:LOOOP.HK


由堅尼地城出發,途中會經過東華痘局紀念公園,「東華痘局」當年負責為華人接種牛痘,後來醫院被拆卸,僅餘奠基石和「東華痘局」牌坊,現時便放在公園作紀念。


沿住域多利道一直走,會發現落山嘅樓梯,就係通往泳棚。


沿住檈梯往下走,沿途都有指示。


途中會經過一間簡陋嘅鐵皮泳棚,係俾泳客沖換衫嘅地方。


泳棚係一條木橋延伸到海面上,四周都係大海,好壯觀。


咁特別嘅景色,吸引好多人嚟打卡。


泳客仲喺度放咗個金魚缸!

荔枝角都曾有泳棚

其實除咗西環泳棚之外,香港之前仲有一個好出名嘅泳棚,就係美孚荔灣泳棚,泳棚就位於今日嘅荔枝角公園,當年設備都好完善,不但附設食肆等設施以吸引顧客,而且仲有地方俾泳客沖身、換衫、儲物,至理髮服務都有提供,亦有小艇出租,所以泳棚係昔日市民運動同消閒嘅好去處。

不過,隨住社會發展,加上海港水質愈嚟愈差,政府陸續將泳棚嘅土地用嚟發展,好似荔枝角灣泳棚咁,去到80年代,就因為地區發展要進行填海工程而被拆卸,最後就變成咗今日嘅荔枝角泳池同荔枝角政府合署啦!

相片來源:互聯網


荔枝角曾經有個泳棚,可惜已成歷史。