有唔少人年輕嘅時候,都希望將來做一個運動員,往往因為唔同原因而放棄。喺日本,就有一位小女孩野田樹潤,年紀輕輕,就立志成為職業賽車手。佢憑住天份同努力,而家已經成為日本最年輕嘅賽車手,今個月初只有14歲嘅佢仲贏得喺丹麥舉行嘅F4方程式賽車比賽冠軍添!

野田樹潤現年14歲,佢爸爸係一位退役F1車手,多年嚟都未能完成F1奪冠夢想,喺10年前帶住遺憾引退。為咗幫爸爸完成夢想,野田樹潤3歲嘅時候已經開始學小型賽車,並且立志成為職業賽車手。

喺3年前,野田樹潤11歲嘅時候接受日本電視節目訪問,當時野田樹潤就對方程式賽車顯得非常熟悉,又喺記者面前坐上賽車,同前輩比試嘅時候更以壓倒性成績勝出。

後來日本傳媒發現野田一家原來已經移民去丹麥,野田樹潤解釋係因為日本規定必須年滿16歲先至可以參加正式賽事,而丹麥就係少數可以讓14歲車手參加正式賽事嘅國家,佢早前就喺當地舉行嘅F4方程式賽車比賽中,以初次登場嘅姿態贏得冠軍。

原圖:FB@Juju / 野田樹潤