唔少人搵工都遇過唔少挫折,問題除咗出於自己身上,話唔定面試官對求職者有偏見先至係真正原因。今次就同大家介紹下有邊啲常見嘅偏見啦!

1. 近似偏見(Affinity bias)

唔少人都會偏好一啲同自己有相似特徵嘅人,因為有相似特徵,就容易產生共鳴。面試官容易偏好一啲同自己讀同一間學校,或者有共同興趣嘅求職者。

2. 歸因偏見(Attribution bias)

好多人都會將自己嘅成功歸功於自己能力、失敗歸咎於外在因素。但對住其他人就相反,人哋嘅成功就係運氣、失敗就係因為能力不足,所以唔少公司都會篩走一啲弱點較多,而唔係揀出較符合要求嘅求職者。

3. 確認偏見(Confirmation bias)

有啲人會傾向尋找支持自己睇法嘅證據,而忽略一啲同自己睇法相反嘅信息,最終就變成選擇性接納意見,導致另一種偏見。

4. 遵循偏見(Conformity bias)

有啲人會傾向聽從上司或者大多數人意見,認為佢哋嘅意見一定有道理,有時招聘期間,可能大部分人對求職者持負面意見,但就算有個別人士持正面意見,佢哋最終都會跟隨主流意見。

5. 對比效應(Contrast effect)

我哋不時都會將唔同人比較,期間或會因為太極端而產生偏見。就好似面試官連續見咗幾位求職者,表現未如理想,但之後出現一位較正常嘅求職者,面試官容易有一種偏見認為佢表現好好,但如果佢係第一位面試,無得比較就未必能夠為面試官留下好印象。

6. 性別偏見(Gender bias)

性別偏見可以話係最普遍嘅一種偏見,求職者會因為佢嘅性別,而被高估或低估佢哋嘅工作能力,主要原因係啲人會認為某一性別應該從事某啲特定職能。

原圖:大公報