聽日就係端午節,佳節當前,本應人人歡喜,但近日受到疫情影響,好多基層市民都無工開,仲隨時手停口停,有見及此,福幼基金會早前展開一個抗疫扶貧項目「有福同港‧有飯同享」,派發飯盒俾有需要嘅劏房戶同失業基層人士,而喺端午節之前,仲會向基層市民派發應節糭,等大家高高興興過端午。

據福幼基金會總幹事陳敏樂表示,該會本來針對劏房戶小朋友,近期疫情關係,關注重點就擴大至一般基層市民,佢表示:「因為有朋友反映,好多基層都係『炒散』,疫情之下無工開,以前住劏房嘅,可能連劏房都住唔起,要做露宿者。所以我哋推行呢個派飯活動,至少可以幫佢哋解決三餐,另一方面,又可以令食肆有收入,幫食肆度過難關,亦等佢哋唔使炒人,基層可以保住份工。」

福幼基金會自從4月底至今,已經喺幾個基層較集中嘅社區包括太子、土瓜灣、觀塘、佐敦同北角等,派發超6,700個飯盒。陳敏樂仲發現香港人好有善心:「今次活動反應好好,好多食肆都第一時間嚮應,亦有啲人願意捐米,有人話可以派生果,原來大家齊心的話,真係可以令成件事好豐富。」

有善心嘅除咗食肆之外,仲有一班街坊,陳敏樂表示:「有次去到佐敦區,派飯期間,發現有個婆婆企咗好耐,後來同佢傾,先發現婆婆唔係自己想要,而係因為鄰居行動不便,好想攞俾佢!我哋聽完之後真係好感動,呢個亦正正表達咗『獅子山下』嘅守望互助精神,唔係為自己,而係為其他朋友。」

陳敏樂仲話,活動會繼續推行,希望大家同心合力,可以捱過疫情。


福幼基金會及快樂港仁在疫情初期合力動員超過400位義工,齊心協力包裝12萬個口罩和3000個抗疫福袋,並分批免費派送予病患者、長者、劏房家庭、傷殘人士,以解基層燃眉之急。


福幼基金會及快樂港仁的「有福同港‧有飯同享」愛心飯盒行動,已經在太子、土瓜灣、觀塘、佐敦及北角區展開。

福幼基金會義工更把愛心飯盒派送到佐敦、油麻地及深水埗的拾荒者和露宿者。


福幼基金會總幹事陳敏樂(左)表示,活動會繼續推行,希望大家同心合力,可以捱過疫情。