宜家出街唔小心跌咗個銀包,尤其是入面有唔少現金嗰隻,真係唔好指望仲執得返。不過,人間依然充滿愛,有位行動不便嘅伯伯,喺搭巴士嘅時候不慎漏低個銀包喺車上,好彩得兩名熱心車長幫手搵返,真係可喜可賀!

話說前幾日有位姓林嘅好心車長喺271號巴士執到個銀包,入面有個人證件同唔少現金,林車長於是將銀包交俾站長,再喺FB群組「Tai Po大埔」出post尋失主。原嚟呢個銀包嘅失主係一位行動不便嘅伯伯,佢發現唔見咗個銀包之後好緊張,因為入面有啲錢係朋友嘅。就喺伯伯彷徨無助之際,佢遇到下一班271巴士嘅楊車長,見到伯伯唔見銀包又身無分文,於是義載佢去總站站長室,協助伯伯尋回失物。伯伯最後搵返個銀包終於成個人鬆晒,安心返屋企,兩位幫手嘅熱心車長亦得到公司出post嘉獎。

圖:FB@ Tai Po大埔,FB@ KMB九巴專頁