唔少人平時都會有清潔耳垢嘅習慣,用棉花棒或耳挖伸入耳仔去撩,不過有醫生就指出其實耳垢係唔需要特別清潔嘅,清潔方法不妥更有機會導致聽力受損。喺台灣,早前就有一名女子就因為用棉花棒清理耳垢,導致出現耳鳴、耳痛嘅情況。

根據台灣傳媒報道,當地耳鼻喉科醫生李瑞文早前分享咗一宗56歲婦人嘅病例,佢喺今年3月中出現咳嗽、耳痛,同埋耳仔流出分泌物嘅情況,佢最初自行去到藥房買成藥同藥水,但情況無改善,其後更出現耳鳴、聽力變差等情況,於是去求醫。

呢名婦人平時習慣用棉花棒清潔耳垢,李瑞文為佢檢查後發現,佢嘅外耳道佈滿密密麻麻白點狀嘅黴菌,移除菌絲後,見到耳道深處仲有啲黏稠膿液,而左耳耳膜內亦因此受到感染,出現一個細小嘅破洞。李瑞文為佢處方抗生素藥物同埋藥膏之後,兩個月就已經好返晒。

屯門醫院耳鼻喉科副顧問醫生黃霆嘉早前就表示,耳垢有助抑制細菌生長同保護耳道,可以隨住新陳代謝自行離開耳道,唔使特別清潔,如果用棉花棒等去挖耳仔,有機會令耳垢越推越入,導致聽力受損。佢又話有需要嘅話可以用耳垢軟化劑或潔耳液,將耳垢沖走,但強調要跟從指引正確使用,佢又唔建議使用耳燭清潔耳垢,因為無證據顯示有效,甚至有機會燙傷耳道令耳膜穿窿。

原圖:新浪