喺新冠肺炎疫情期間,全球唔少國家都限制旅客入境,慎防病毒由外地輸入,就算最近疫情開始緩和,各國都對「解禁」顯得相當小心。美國一個信用卡獎勵計劃資訊網站,最近就邀請鍾意旅行嘅人士,參加一場虛擬環遊世界之旅,完成之後仲可以得到1000美元(約7750港元)獎勵添!

信用卡獎勵計劃資訊網站UpgradedPoints.com早前就發布咗呢個招聘,會邀請旅客進行10次虛擬旅行,提到旅客可以揀迪士尼樂園、羅浮宮、長城等旅遊景點,完成遊覽之後需要答4條問題,包括點解揀呢個景點虛擬遊覽、呢個景點最吸引人嘅地方、完成虛擬遊覽之後會唔會親自去到呢個景點,以及虛擬旅行嘅整體體驗,完成呢幾條問題之後就可以獲得1000美元現金。

UpgradedPoints.com又提到,申請人需要「熱愛旅行文化」、「對藝術、探索同冒險充滿熱情」、「注意細節」、「可於一個月內進行10次虛擬旅行」,同埋「活躍於社交媒體」。申請人申請嘅時候亦要回答一系列問題,包括解釋點解鍾意旅行、最鍾意嘅旅行地點,同埋點解自己係合適人選。

呢份筍工嘅報名截止日期係6月30日,成功申請者之後會收到一份表格,喺完成每次虛擬旅行之後填寫,並且喺7月30日之前完成,先至可以獲得獎勵。

原圖:新華社