炎炎夏日,出去郊外行山真係要帶多啲水先得,但千祈唔好飲郊外啲水呀!內地早前有一名男子,飲過啲山泉水之後,個鼻出現痕癢、出血等情況,佢去醫院求診,醫生檢查後發現鼻腔入面有一條3cm長嘅吸血水蛭,睇見都打晒冷震!

根據內地傳媒報道,早前廣西有一名24歲張姓男子回鄉探親,隔咗一段時間就覺得個鼻好唔舒服、好痕,有出血情況,有時仲會覺得好似有嘢喺鼻腔入面爬添。張男於是就去到醫院求診,耳鼻喉科醫生吳海峰發現佢個鼻入面有深色異物,用鼻腔鏡檢查後發現,竟然係一條仲郁緊嘅吸血水蛭。

吳醫生於是嘗試將水蛭取出,試咗用唔同尺寸嘅鉗都夾唔到出嚟,仲令到張男痛不欲生。最後吳醫生就決定麻醉張男嘅鼻腔深處,連水蛭都被麻醉埋,成功夾出水蛭,發現水蛭長達3cm,等麻醉藥過咗之後,水蛭就繼續不停咁蠕動。

張男表示,記起自己回鄉期間曾經飲用過山泉水,可能因為咁而令水蛭入侵體內。吳醫生就表示,水蛭體積細小,平時肉眼睇唔多覺,飲用山泉水或者用山泉水洗臉,有機會令幼蟲進入身體。佢提醒市民唔好直接飲用溪水、山泉水等生水,如果覺得鼻腔有唔舒服,或者有疼痛、出血等情況,就應該盡快求醫。

原圖:騰訊、新浪