喺新冠肺炎疫情期間,唔少國家都限制市民聚集、要求保持社交距離,有唔少公眾場所都要被迫關閉。全球有唔少動物園因此而失去收入,而園內動物嘅伙食費就成為動物園極大嘅財政負擔,喺日本北海道札幌市一間動物園,就發起咗一個極具創意嘅籌款活動,引起網上熱烈討論,亦迅速達成籌款目標。

呢間名為North Safari Sapporo嘅動物園,係一間體驗型嘅私人動物園,早前就因為疫情關係要需要關閉。佢哋就發起咗一個籌款活動,以支付園內動物嘅飼料費用,最特別嘅地方就係捐款人可以獲得來取動物園動物嘅獨一無二禮物。

捐助3千日圓(約217港元)就可以得到內有獅子毛、貓頭鷹羽毛同蛇皮嘅「3入開運御守組」、蛇皮鑰匙圈或者河狸咬過嘅木杯墊;捐5千日圓(約362港元)就可以得到用蛇殼或鸚鵡羽毛製成嘅耳環;捐7千日圓(約507港元)就可以得到有企鵝、水豚等動物腳印T恤。而最特別嘅禮物,就係捐7萬日圓(約5069港元),可以得到由獅子咬爛、抓爛嘅牛仔褲一條,園方仲會拍片將獅子「製作」呢條牛仔褲嘅過程公開添。

有咁特別嘅禮物,自然吸引唔少人捐錢啦!呢個籌款活動好快就已經達成目標,原本目標金額係2500萬日圓,至今已經超標接近4成,籌得接近3500萬日圓!

原圖:campfire@ノースサファリサッポロ