出嚟搵工,僱主除咗會睇求職者嘅學歷、工作經驗,更會透過面試觀察求職者嘅性格、行為適唔適合。如果你喺面試度衰以下呢4樣嘢,咁真係學歷再高、經驗再豐富都救唔返!

1.衣著打扮

衣著打扮係面試官對你嘅第一個印象,通常男士著西裝、女士著套裝就萬無一失。但係預著一啲要展現自己獨特個性嘅工例如設計師咁,就要因應情況改變自己嘅衣著喇!

2.「我仲搵緊合適嘅工」

雖則坦白係好事,但對面試官咁坦白就真係……

如果你喺面試入面提到「我仲搵緊合適嘅工」,會令對方覺得就算你加入公司,當遇到更適合嘅工之後會毫不猶豫咁跳槽。無公司想花時間同資源培訓一個隨時會走嘅員工,所以呢句說話係面試入面係大忌!

3.談論私事

當面試官問你「平日有咩興趣」嘅時候,其實想大概了解你個人嘅基本性格,睇下你會為公司做啲乜,並唔係想知你嘅私事,屋企有幾大、先生做咩工、同仔女關係如何呢啲可以等遲啲做咗同事熟咗先講。喺面試過程中提及私事亦會降低你嘅專業程度。

4.懶幽默

就算你平時為人幾風趣幽默,都唔好喺面試度表現出來。如果你企圖用幽默嚟加深自己喺對方心目中嘅印象,就要視乎當時嘅情況同面試官嘅態度,否則遇到嚴肅嘅面試官唔單止唔識欣賞你嘅幽默,仲會覺得你懶幽默、唔專業。所以,面試嗰陣最好都係正經啲好。

圖:shutterstock