近日北京嘅新冠肺炎疫情反覆,有報道指當地市場用嚟切三文魚嘅砧板,被驗出有新冠病毒,令當地民眾聽到三文魚都驚!早前德法公共電視台(ARTE),就因為2018年有大量養殖三文魚死亡,於是派記者去到挪威三文魚養殖場調查,發現當地養殖場環境污糟,大量三文魚生活喺充滿排泄物嘅海水入面,寄生蟲非常多。

挪威係三文魚嘅出口大國,為咗了解點解有大量養殖三文魚死亡,德法公共電視台就去到挪威嘅養殖場調查,佢哋發現喺挪威北部嘅海域,幾乎每個養殖場都有過萬條三文魚,記者深入了解其中一個養殖場,發現環境惡劣,啲三文魚甚至係迫到唞唔到氣。

另外,養殖三文魚嘅海水充滿排泄物,亦導致好多三文魚生病,身上滿佈傷口,甚至有俗稱「魚蝨」嘅寄生蟲添。報道又提到,每年都有大約18.3萬條養殖三文魚,成功逃離養殖場游到海洋,同野生三文魚搶食物、傳染魚蝨俾佢哋,威脅佢哋嘅生命。

原圖:大公報