喺疫境之中成功搵到工固然值得開心喇,不過初初返工要注意啲咩?想快啲融入新環境,唔好得罪上司、同事就要留意以下幾點。

1. 準時返工,待人有禮

初來報到,人生路不熟,對人有禮貌、主動打招呼好重要,咁先可以俾到好印象同事,快啲融入。雖然每間公司嘅返工時間都唔同,有啲更採取彈性上班時間,但作為新人最好就係準時返工喇!

2. 避免「自來熟」

你可能好想快啲同同事打成一片,但都唔好一返工就打探同事嘅私人生活,或者同同事交換社交媒體賬號,咁樣會俾人一種「好八卦」嘅感覺,有啲同事亦唔願意公開自己嘅私人生活。同時亦要避免對同事過分熱情、熟稔,以免嚇親人,造成反效果。

3. 不合理情況要Say No

新來新豬肉,有啲老油條同事鐘意「擺款」,塞勁多嘢俾你做,遇到呢啲唔合理嘅情況梗係要識Say No,否則你以後嘅日子都唔會好過。

4. 唔好太快安定落來

啱啱嚟到新環境,你可能覺得好快安定落來,開始喺辦公台擺好多私人物品。但其實一日未過試用期都仲係觀察期,話唔埋你發覺自己唔適合呢份工或者唔係你期待嘅工作,所以都係睇定啲先。

圖:photoAC