雖然話宜家經濟唔好,搵工比以前難咗,但只要肯搵、肯做,見工嘅機會總係有嘅。不過,如果你發現自己見親工之後都無下文,咁可能係因為你喺面試期間衰咗呢3樣嘢。

1. 對職位無表現出熱情

就算你自問學歷、技能、工作經驗都非常符合職位要求,有信心可以勝任,但如果你表現唔到對職位嘅熱誠,就無辦法令面試官相信你會為公司帶來貢獻,甚至推動公司進步。

2.無辦法證明自己嘅技能符合職位要求

雖然未必個個求職者都有該職位嘅工作經驗,但你喺其他工作、生活上學到嘅技能亦分分鐘有幫助。你需要做嘅係將自己嘅技能、過往經驗同應徵緊嘅工作結合起嚟,喺面試官面前證明你有能力勝任,而唔係一昧講自己嘅學歷有幾高、拎過幾多獎等。

3.表現過分自信

雖則人有自信係好事,但過分自信就會變咗自負、自大。一直喺面試官面前吹噓自己嘅成就,反而會造成反效果。你只需將自己過往點樣協助公司解決難題、參與過咩大型活動等經歷分享出嚟,去說服對方你有能力為公司解決問題就已經足夠。

圖:網上圖片