喺新冠肺炎疫情期間,唔少餐廳都會增設一啲隔板,分隔食客,慎防病毒經飛沫傳播,不過有啲餐廳就未必有咁多隔板喇!日本最近有一間公司就推出咗一款便攜式隔板,帶住佢無論係食飯定返工,都可以幫手隔晒啲飛沫。

中井銘板株式會社早前喺官方網站宣布,會因應疫情推出呢款便攜式隔板,而日本有電視節目亦都介紹過呢款隔板,佢可以摺成同普通文件夾差唔多厚度,並設有手柄方便攜帶,就咁睇落同一個公事包差唔多大細。

呢款便攜式隔板現時喺日本亞馬遜發售,售價為2390日圓(約172港元),唔少網民都讚呢個產品唔錯,睇落好似幾輕便,不過亦有網民表示,每次用完都要消毒相當麻煩。

原圖:中井銘板株式會社