受疫情影響,各行各業大受打擊,政府早前宣布,由7月1號起至今年年底,放寬公共交通費用補貼計劃門檻,由宜家嘅400蚊降到200蚊,以減低市民嘅交通開支負擔。另外港鐵亦公布,將於今年7月1號至出年1月1號期間,推出為期半年嘅「程程20%車費扣減」優惠,5款全月通加強版同港鐵都會票都減價100蚊。

政府舊年底優化嘅「公共交通費用補貼計劃」,只有每個月超出400蚊嘅公共交通開支先有得拎補貼。而由下月起,補貼嘅門檻會降到200蚊,市民可以拎到嘅補貼可以咁計:

(每月實際車費開支-200蚊)X 33.33% = 車費補貼

即係話,由下個月起,市民每月嘅交通費用只需要達到1400蚊或以上,就可以領取全額400蚊補貼。而領取補貼嘅方法同宜家一樣,喺各大港鐵站、便利店等地點用八達通嘟一嘟就拎到。

圖:文匯