孭住一袋二袋攝影器材,攀山涉水,然後靜心等待,分分鐘一等就要等十個八個鐘,還有討厭嘅蚊子來襲……咁辛苦,只係為咗將香港嘅自然美景帶畀觀眾。生態攝影及生態紀錄片製作人黃遂心(Daphne),因為愛大自然,毅然由英國回流香港,希望透過佢嘅相片、錄像,提醒大家保育自然生態嘅重要性!

受父母影響 愛上大自然

Daphne咁熱愛大自然同生態,原來要多得佢哋父母,佢表示,父母都喜愛大自然,強調環保,因此喺年紀好細嘅時候,已經經常帶佢去行山。「細細個開始對行山感興趣,喜歡睇雀睇蝴蝶,睇BBC。」到中學階段,她便主動報名去跑山,並開始拍攝生態環境。

後來Daphne留學英國,就讀海洋及生態歷史攝影,期間訪尋中華白海豚香港海域蹤跡,訪問研究員、保育團體、漁民等,拍成紀錄片《白海豚失樂園Breathing Room》,獲美國WorldFest Houston International Film Festival「海洋學/海洋生物學」紀錄片金奬,並入圍美國Jackson Wild Media Awards 特別評審團:外語片。


Daphne經常日曬雨淋,攀山涉水,只為拍出香港最美嘅一面。


Daphne拍攝嘅短片,《Let It Bee: Keeper of British Black Bees》入圍多個影展,包括New Earth International Film Festival。


《白海豚失樂園》獲美國WorldFest Houston International Film Festival「海洋學/海洋生物學」紀錄片金奬。

毅然回港 拍攝生態紀錄片

Daphne大學畢業後,加入當地嘅製作公司,為英國廣播公司(BBC嘅節目做製作不過,英國嘅拍攝分工精細,Daphne負責資料搜集工作,整天留喺公司。於是佢選擇回港,替香港電台攝製生態紀錄片系列《大自然大不同》。「香港的製作由於Budget細,甚麼都是一腳踢,要自己做聯絡,自己拍攝,不過我鍾意到外面睇嘢,就算辛苦啲,都想自己拍一套紀錄片。」

Daphne曾經考慮過,繼續留國發展始終佢自細就鍾意睇BBC生態節目,而且有影響力,但佢後嚟到,港台輯紀錄片香港首次出現新嘗試,佢希望藉著呢個節目話俾全世界,香港片土地生物多樣性有幾豐富。「好多人都覺得香港係石屎森林,但其實香港生物多樣性非常高,英國可能只得幾種兩棲類,但香港有廿幾種,香港佔全中國4分之的海洋生物,香港又處於遷徙雀鳥嘅航道,會有好多雀鳥路經香港,而且每一年都增加緊。」


Daphne指香港生物多樣性非常高,例如有好多候鳥會路經香港,圖中嘅灰尾漂鷸就係香港春秋兩季嘅過境遷徙鳥。

最愛影昆蟲

原來Daphne最鍾意影嘅,就係唔少人都好驚嘅昆蟲,而且一講到昆蟲,佢就滔滔不絕:「我覺得昆蟲好有趣,一來因為比較容易接觸,而且可以慢慢睇,睇得細緻一些!可以睇到平時見不到嘅行為。」「例如我最鍾意嘅跳蛛,每隻個性都不同,有些會同你玩,有些會好驚!又例如蜜蜂,只要你慢慢接觸,就會發現唔得人驚,佢哋會用身體語言話俾你知佢嘅感受,你幫過佢、救過佢,佢係會知道嘅!」

現時Daphne同幾位年輕朋友合作開設Production House,主要為港台及其他NGO拍攝同大自然有關嘅製作,未來佢哋亦考慮開設YouTube Channel影片可以提升香港人嘅自然教育意識。「不過大家都有正職,有啲係研究生,有啲喺NGO工作,不可能全身投入,但大家都希望繼續做好佢!」

喺今日嘅香港,好多年輕人都搵唔到出路,Daphne就勉勵大家;「其實只要努力,可以自己創造機會俾自己!」

相片來源:FB@Daphne Wong - Photographer & Filmmaker


Daphne鍾意拍攝昆蟲,圖中為毛脛豆芫菁。


早前Daphne拍攝到一邊吸水一邊「尿尿」嘅燕鳳蝶。


為咗拍攝呢隻鋸艷蛛,Daphne用咗個半小時同佢玩「捉迷藏」!