唔少人食牛扒嗰陣都鍾意食生生地,不過豬肉就唔得喇,豬肉一定要煮熟晒先好食!喺泰國,就有一名18歲男生懷疑因為食咗一啲未經煮熟嘅豬肉,導致全身都有大量絛蟲寄生。

素羅娜麗科技大學醫學院、寄生蟲研究中心(PDRC)最近就喺Facebook公布呢宗病例,呢名男生之前因為持續出現頭痛、嘔吐、抽搐同感官扭曲等症狀,去到當地醫院求醫,醫院為佢進行磁力共振檢查,確診患上囊蟲病。喺佢磁力共振嘅相片入面可以見到,佢嘅腦組織、頭部、胸腹部、脊椎同四肢,幾乎全身都有白色一條條豬肉絛蟲嘅蹤跡。

醫生認為,呢名男生應該係食咗一啲未煮熟嘅豬肉,或者有蟲卵嘅蔬菜、水果同水源,再加上可能佢進食前無洗手,導致佢全身都生滿寄生蟲,佢經過類固醇、驅蟲藥等藥物治療之後,情況而家已經有所好轉。

香港食物安全中心網站亦有提醒市民,豬肉必須徹底煮熟先可以食用,中心部分要喺攝氏75度或以上持續烹煮至少15秒,如果煮完之後仲見到豬肉有粉紅色肉汁流出或中心部分呈紅色,就應該再煮下,直至熟透。食安中心又建議,打邊爐嘅時候要用唔同筷子處理生熟食物,亦要避免將唔同食物放喺檯上導致交叉污染。

原圖:RTHK、FB@PDRC ศูนย์วิจัยโรคปรสิต สำนักวิชาแพทยศาสตร์ มหาวิทยาลัยเทคโนโลยีสุรนารี