今年因為新冠肺炎疫情關係,香港嘅大專院校都難以如常上課,或改以線上形式授課。南韓就有一間私立大學,因為新冠肺炎疫情關係,決定向校內1.5萬名學生退還今個學期學費。

首爾著名私立大學建國大學總學生會喺4月嘅時候,就以高額學費同學生所獲教育資源不符為理由,要求校方退還學費。校方回應時表示,難以返還學生已繳納嘅學費,但會制定補償方案。雙方舉行過8次會議,最終就退還學費方案達成共識,校方將以減免下學期學費嘅形式,退還今個學期學費,具體金額將於今個禮拜內決定。

有分析認為,建國大學呢個決定將影響到南韓其他大專院校,因為由南韓全國高校學生會組成嘅「退還學費運動本部」,現時正準備就退還學費問題,向各大專院校同教育部提出訴訟。

原圖:FB@건국대학교