喺俄羅斯,有一隻叫辛巴(Simba)嘅小獅子,細細個就被迫同母親分開,被人帶到去索契市(Sochi)一個沙灘同遊客合照,後來辛巴越來越大隻,「飼主」驚佢逃走就打斷佢嘅後腳,由於多次被虐打,辛巴健康惡化,結果被遺棄喺達吉斯坦(Dagestan)一個污糟嘅穀倉入面挨餓、挨凍等死。好好彩,俄羅斯當局接報之後就展開搜救,將辛巴救出,送到動物收容所接受治療,逐漸康復。俄羅斯總統普京知道件事之後,並下令執法部門徹查事件。

辛巴出世幾個禮拜之後,就被不法之徒將佢由母獅身邊偷走,直至去年夏天先至被人發現佢喺索契市一個沙灘同人合照。後來被飼主虐打,令佢健康惡化,甚至因為脊椎重創幾乎死亡,好彩救援人員及時將佢救出。

獸醫師達拉基安(Karen Dallakyan)表示,辛巴嘅脊椎傷勢嚴重,患有壓瘡、腸道阻塞同腿部肌肉萎縮等症狀。但經過護理人員3個月以嚟嘅照顧,辛巴逐漸好返,重新學行,現時已經可以小步快跑。後來達拉基安喺一次會議上,向普京提及辛巴遭遇,又指出相關部門未有跟進調查,令普京震怒,承諾會下次徹查事件。

至於索契市幫遊客同辛巴影相嘅攝影師,佢否認曾經虐打辛巴,聲稱早已經將辛巴交俾新主人。

原圖:FB@Реабилитационный центр защиты диких животных и птиц фонда «Спаси меня»