現年54歲、有「股壇長毛」之稱嘅獨立股評人David Webb,早前喺個人網站宣布,自己確診前列腺癌,部分癌細胞甚至已經擴散至骨骼,未來會「減產」,或唔會再花大量時間撰寫調查報告。唔講唔知,原來前列腺癌係香港常見癌症第4位、常見男性癌症第3位,有醫生指出近年香港前列腺癌病發年齡越來越小,呼籲要注意飲食,預防癌症。

醫管局癌症資料庫數字顯示,2016年香港錄得接近2000宗新症,較2007年數字增加接近6成。泌尿科專科醫生葉維晉表示,前列腺癌本身生長速度好慢,係一種「老人病」,通常男士年屆60發病率先開始上升,但近年越來越多50幾歲就發病嘅個案。

葉維晉又話,前列腺癌喺美國較普遍,但近年華人個案近年增加唔少,相信同西方飲食文化有一定關係,葉維晉指防癌可以由飲食入手,包括食多啲番茄等抗氧化蔬果,亦要少食紅肉、男士年年驗身。

原圖:Infectionurinaire.net