平時返工,少不免遇到一啲好鍾意擦上司鞋嘅同事,希望同上司打好關係,不過擦鞋其實都有唔少壞處㗎,為咗公司同同事著想,就真係少啲擦鞋為妙!今次就同大家數下有咩壞處啦。

第一:擦鞋令上司誤判

上司或者老闆要作出正確決定,就必須要有正確嘅資訊,但如果有啲人成日掛住擦鞋,剩係講一啲上司同老闆想聽嘅說話、報喜不報憂,結果好容易令佢哋作出錯誤嘅決定。有啲人更因為唔想得罪上司同老闆,而唔願意講真話指出有咩問題,亦令上司同老闆無法修正過嚟,一錯再錯。

第二:擦鞋影響溝通

另一方面,擦鞋亦都好影響溝通,明明有嗰句講嗰句就夠晒直接、簡單。但有啲人為咗令上司同老闆感覺良好,就經常用花言巧語去包裝,一來嘥時間,二來太過迂迴亦容易誤會。

第三:下屬有樣學樣、不善生產

如果擦鞋嘅人係一位中層人員,佢對上司擦鞋,佢嘅下屬亦都會看在眼裡,有樣學樣。如果連下屬都掛住擦鞋,生產力又點會高呢?

第四:累積團隊怨氣

同樣地,作為一位中層人員,佢嘅職責亦包括擔任高層同基層員工嘅橋樑,如果佢掛住討好上司同老闆,無將基層員工嘅怨氣同不滿及時反映,上司同老細就無法及時作出一啲「利民政策」,加深矛盾,最終一發不可收拾。

原圖:中國網