近排天氣熱咗,夜晚唔開冷氣根本瞓唔到,但吹得多冷氣個人濕氣會加重,變得好容易累、無胃口甚至肚脹、腹瀉。濕氣重有人會飲杯祛濕茶,但原來祛濕茶唔係人人啱飲,為此我哋特登請來註冊中醫師馬琦傑做個小訪問,教大家點樣自製簡單祛濕湯水~

馬琦傑醫師話,吹得多冷氣,會減少排汗機會,好容易阻礙身體排走濕氣,令濕氣困喺身體內。雖然市面上有啲現成嘅薏米水、祛濕茶買,但馬醫師話市面上嘅薏米水通常添加大量糖,飲太多對健康無益。而脾虛人士亦唔適宜飲純袪濕嘅祛濕茶,應以補脾為主,袪濕為副。

為此,馬醫師建議我哋可以自己煲參苓袪濕湯嚟祛濕,適合大部分人飲用之餘,所需材料同做法亦較簡單。

材料

黨參(小朋友可改用太子參) 3錢,茯苓4錢,乾淮山1兩,生熟薏米各5錢,蓮子肉4錢,白扁豆4錢,瘦肉1斤,清水適量

做法

1.瘦肉汆水備用

2.其他材料洗淨

3.扁豆用白鑊炒一下備用

4.大火水滾後,加入所有材料,轉中小火,煲約2小時即可

不過,馬醫師就提醒有感冒症狀或對以上食/藥物過敏者不宜服用。另外除咗飲袪濕湯外,拔火罐亦係袪濕嘅好方法之一。

圖:受訪者提供,網上圖片