隨住新冠肺炎疫情逐漸放緩,唔少地方嘅學校亦陸續復課。喺河南,當地學校亦都陸續復課,一名5歲男童喺屋企著幼兒院校服嘅時候,發現自己肥咗,連恤衫鈕都扣唔到,要縮埋個肚搵嫲嫲幫手先至勉強扣到。有網民睇到條片之後留言,讚呢位男童好可愛,但也有網民憂慮男童體重超標,影響健康。

據報呢位男童因為疫情期間長期留喺屋企,體重增至約104磅,有網民甚至話呢位男童仲重過佢自己,又話家長應該要注意子女飲食、多鍛煉,保持健康。

香港肥胖醫學會會長周振中醫生早前接受傳媒訪問時,引述《新英倫醫學雜誌》2016年一個醫學研究,追蹤17歲左右嘅肥胖兒童長達40年,發現佢哋嘅心血管疾病機率同死亡率,係正常兒童嘅2至5倍,另外亦有研究指,7歲開始肥胖並持續到青春期,患二型糖尿病嘅機會係正常兒童嘅4倍。

周振中醫生表示,最令人擔心嘅係肥胖兒童食大咗個胃口,習慣食煎炸肥膩嘢,會令腸內可以控制肥胖基因嘅益菌產生變化,同時個人口味、思維、飽感等轉變,容易令人肥胖。

原圖:微博@未來網