觀塘市中心重建計劃正進行得如火如荼,市區重建局行政總監韋志成早前發表網誌,介紹區內全港首個附設室內巴士候車區嘅公共運輸交匯處,佢預料今年第四季完成驗收之後,就可以交俾政府籌備啟用安排,預料出年第一季就可以開放市民使用。

韋志成形容呢個公共運輸交匯處,係觀塘市中心重建項目其中一項重要建設,重置咗重建前附近一帶多條巴士線同小巴站,等居民有更集中、更舒適嘅乘車同候車環境。佢話又第時私家車、巴士、小巴同的士等唔同車輛,會安排喺唔同出入口進出,從而大大減低出現交通樽頸、引致周邊道路擠塞嘅機會。

韋志成表示,呢個公共運輸交匯處設有兩層,分別係上層嘅巴士總站同下層嘅小巴總站,佢哋將巴士總站改成環型設計,中央部分用嚟泊車,8個巴士候車區環繞總站四邊佈局,並進一步同商場室內空間整合,打造出全港首個設有空調巴士候車區嘅巴士總站。到時乘客可以經唔同出入口進入室內巴士候車區等上車,就唔使再喺巴士停泊區等車,唔使再吸廢氣,亦唔使再橫過車道,減低意外風險。候車區內仲會提供座位同無線網絡,真係夠晒體貼!

原圖:市區重建局