財政司司長陳茂波今年2月發表本年度《財政預算案》嘅時候,宣布所有18歲或以上香港永久居民派錢一萬蚊。今日陳茂波喺記者會上宣布,登記手續同其他詳情,市民可以喺6月21日開始登記,最快7月8日就收到錢。

陳茂波表示,6月21日朝早7點開始,市民就可以用透過銀行網站、電子銀行進行登記,之後錢就會直接入落戶口,喺6月21日至6月底登記嘅人,7月8日起就會收到錢,6月30日之後登記,亦會喺一個禮拜之後收到錢。

除此之外,市民亦可以喺全港千幾個地點領取表格,寄去指定郵箱182020,或者交去銀行分行,一般喺兩個禮拜就會收到支票,市民喺6月21日至7月4日做書面登記嘅話,最快喺7月20日收到錢。不過陳茂波呼籲,盡量使用電子方式登記,同埋用銀行戶口收錢,既可以快啲收到錢,亦可以減低行政費。

至於海外嘅香港居民,如果有銀行戶口,亦可以網上登記,一萬蚊直接存入戶口,亦可以郵寄表格或者喺香港郵政網頁登記,但支票就要親自領取。

原圖:文匯報