為咗節省能源、減少碳排放,新巴城巴早前就研發咗佢哋第一架太陽能裝置雙層巴士,並且喺星期五(5日)已經正式投入服務。呢架太陽能巴士會日常行走8號線,來往杏花邨同灣仔北,見到嘅話不妨留意下喇。

呢架太陽能巴士嘅車頂一共設有20塊太陽能板,佔成個車頂嘅8成面積,輸出功率為1,500瓦,可以用嚟供電俾車上嘅照明同乘客資訊設施。

太陽能板收集返嚟嘅能源,會轉化為電能並儲存喺電池裡面,藉此減少使用引擎推動發電機產生電力,從而減低耗油量同碳排放。預計每日可以供電長達7個半鐘,每年減少約 0.716 公噸碳排放量,相當於31棵5米高大樹為社區進行空氣淨化。

新巴城巴將會繼續監測巴士環保表現,研究為更多巴士加裝太陽能板,以及利用太陽能為車廂更多設施供電嘅可行性。

原圖:新巴城巴