早前英國一位二戰百歲老兵Captain Tom Moore,透過喺家中花園步行,為英國國民保健署(NHS)籌款。而當地一位自細患有腦麻痺嘅9歲男童,就受到Captain Tom嘅啟發,用步行嘅方式為醫院同自己就讀嘅特殊學校籌款,最終籌到5萬鎊(大約48萬港元)善款。

呢名9歲男童叫Tobias Weller,佢細個就已經患上自閉症同腦麻痺,出入都要用步行架輔助。早前佢就受Captain Tom嘅啟發,決定喺社區以步行馬拉松方式為當地醫院同自己就讀嘅特殊學校籌款。

Tobias每日只能夠步行50米,喺附近鄰居同街坊嘅打氣下,佢最終用咗大約70日時間,完成約42公里距離嘅步行馬拉松,喺上週日(31日)衝線嘅一刻,佢嘅鄰居同親友都為佢歡呼鼓掌。Tobias就話對於自己可以完成到馬拉松感到難以置信,佢表示好享受過程,仲話其他人嘅支持令佢充滿力量,亦係佢堅持落去嘅原因。

Tobias嘅步行馬拉松最終籌到5萬鎊,佢學校嘅老師就表示對佢嘅善舉感到自豪,又話學校會利用善款購置水療池同其他復康設施,為社區帶嚟改變。

原圖:Twitter@jjgiddens